എന്റെ വിയര്പ്പു കുറുക്കിയെടുത്ത കലര്പ്പില്ലാത്ത ഉപ്പ്
ചെന്തീ നിറമുള്ള വാക്കിന് വെട്ടം
ആത്മാവില് പൊള്ളിപ്പനിച്ച്
ഞാന് വാറ്റിയെടുത്ത വിമോചനത്തിന് അമൃത കുംഭം
കാലത്തില് നിന്ന് ഊര്ന്നു പോയി
മണ്പുറ്റുകളില് ഞാന് വീണ്ടെടുത്ത
വന്മരത്തിന് മുളക്കൂമ്പ്
ചങ്ങലത്തഴമ്പുകളില് ,
മുറി കൂടിയ ഓര്മ്മയുടെ അടയാളങ്ങളില്,
വായിക്കാനാവുന്ന ഭൂതകാലത്തിന് ശേഷിപ്പുകള്
സഹയാത്രികരും അനുഗാമികളും
ഒന്നൊന്നായ് വീണു പോകുമ്പോഴും
മരണത്തെ തോല്പ്പിച്ച് ഉയര്ത്തിയ
ധീര പൌരുഷത്തിന് ഉത്തുംഗ ശിരസ്സ്
പ്രളയത്തെ എതിരിട്ട്
ഞാന് ജീവിച്ചിരിക്കുന്നുവെന്ന് തെളിയിച്ച്
മറഞ്ഞ പുല്ക്കൊടിത്തുമ്പിന് ധീരത
ഒഴുക്കിനെതിരെ നീങ്ങിയ
പരല് മീനിന് ദിശ
കൊടുങ്കാറ്റിനെ തുളച്ചു പറന്ന
സൂചീമുഖിപ്പക്ഷിയുടെ കൃത്യത
എന്നാലും നമ്മള്ക്കില്ല
ഒറ്റുകാശിന് തിളക്കത്തില്
പാട്ടുപാടി ആനന്ദിപ്പിക്കും നവ വിദൂഷകര്
മുഖസ്തുതിയെഴുതി പണക്കിഴി വാങ്ങിപ്പോകും,
സ്വന്തം സ്വരമില്ലാത്ത ഉച്ചഭാഷിണികള്
പതിയിരുന്നെയ്യാന് പൊളിവാക്കിന് വിഷം പുരട്ടിയ
പുതുകാല സമര മുറകള്
ചിരിച്ചു വന്നു ജീവനെടുത്തു മറയും
കപടന്മാരുടെ പട്ടാളം
മൊഴിയില് പൊരുളും, മിഴിയില് നിലാവും
ഉടലില് വിപ്ലവ ചരിതം കൊത്തിയ
അടയാള മുദ്രകളും,
വീണവര് വീണവര് പകര്ന്നു നല്കിയ
ചോര മണമുള്ള വിപ്ലവക്കൊടിക്കൂറയും,
നാളെ നമ്മള്ക്കായ് സൂര്യനുദിക്കുമെന്നൊരു
കിനാവുമല്ലാതൊന്നുമില്ല നല്കാന്
വരിക! നീതി മരിക്കാതെ,
സത്യം വീഴാതെ കാക്കാന്
നിങ്ങള്ക്ക് കൂടി ബാധ്യതയുണ്ട്
ഇതാണ് മുഹൂര്ത്തം!