പ്രണയത്തെ വാഴ്ത്തുന്നവരോട്

മൊഴികളില്‍ അര്‍ത്ഥമില്ലാതെ,
മിഴികളില്‍ ആത്മാര്‍ഥതയില്ലാതെ,
വെറും വാക്കിനാല്‍ നാം കെട്ടി ഉയര്‍ത്തിയ
മണല്ക്കൊട്ടാരത്തെ
നീ അടുപ്പം എന്ന് വിളിക്കായ്ക!
ഉയിരില്‍ മിടിക്കാത്ത,
കനവില്‍ പൂക്കാത്ത,
കരളില്‍ വിരിയാത്ത മഴവില്ലിനെ
നീ പ്രണയം എന്ന് ഘോഷിക്കായ്ക!
കരളില്‍ തെളിച്ചമില്ലാതെ,
അലിവിന്‍ മിനുക്കമില്ലാതെ,
ഉടലാല്‍ ഒട്ടിച്ചു വെച്ചതിനെ
നീ കാമം എന്ന് പറയായ്ക !
മഴയിറ വെള്ളത്തില്‍,
കാലം വിട്ട കളിവഞ്ചിയില്‍,
ജീവന്റെ അഭയം തേടിയ
കരി ഉറുമ്പുകള്‍ മാത്രമാണ് നാം!
പരസ്പരാശ്രിതത്വത്തിന്റെ
ഇത്തിരി മഴ നേരത്തെ
നാം എന്തിനിത്ര വാഴ്ത്തണം !
നമുക്ക് പിരിയാം